អ្នកណាខ្លះរួមតុពិភាក្សាជាមួយលោក ស៊ីជិនភីង បង្ហាញមុខ មេដឹកនាំបច្ចេកវិទ្យាវិស័យឯកជនល្បីៗចូលរួមសន្និសីទពិសេស ដើម្បីជំរុញការអភិវឌ្ឍន៍វិស័យឯកជនរបស់ប្រទេសចិន

កាលពីថ្ងៃទី 17 ខែកុម្ភៈ ឆ្នាំ 2025 ទីភ្នាក់ងារសារព័ត៌មាន CCTV របស់ប្រទេសចិន បានអោយដឹងថា ប្រធានាធិបតី ស៊ីជិនភីង 习近平 Xíjìnpíng មេដឹកនាំចិនធ្វើសន្និសីទពិសេស ដើម្បីជំរុញការអភិវឌ្ឍន៍វិស័យឯកជនរបស់ប្រទេសចិននៅការិយាល័យក្រុមប្រឹក្សារដ្ឋនៅទីក្រុងប៉េកាំង ប្រធានាធិបតី ស៊ីជិនភីង បានជួបជាមួយសហគ្រិនវិស័យឯកជនល្បីៗមួយចំនួន។

អ្វីដែលគួរឲ្យចាប់អារម្មណ៍នោះគឺមានតំណាងក្រុមហ៊ុនបច្ចេកវិទ្យាធំៗជាច្រើនរបស់ចិនមានវត្តមានចូលរួមក្នុងការពិភាក្សាដូចជា៖

លោក រ៉ឹនចឹងហ្វេយ 任正非Rènzhèngfēi – ស្ថាបនិក និងជានាយកប្រតិបត្តិរបស់ក្រុមហ៊ុន Huawei ដែលជាក្រុមហ៊ុនឈានមុខគេក្នុងវិស័យទូរគមនាគមន៍ និងបច្ចេកវិទ្យា 5G ។

លោកវ៉ាំងឈ័នហ្វូ 王传福 Wángchuánfú – ប្រធាន និងជានាយកប្រតិបត្តិនៃ BYD ដែលជាក្រុមហ៊ុនផលិតរថយន្តអគ្គិសនីឈានមុខគេរបស់ចិន។

លោក លីវយ៉ុងហាវ 刘永好  Liúyǒnghǎo – ស្ថាបនិកនៃ New Hope ដែលជាក្រុមហ៊ុនផលិតចំណីសត្វដ៏ធំនៅក្នុងប្រទេសចិន។

លោក យ៉ី រ៉ឹនរ៉ុង 虞仁荣 Yúrénróng – ស្ថាបនិក និងជាប្រធានក្រុមហ៊ុន Will Semiconductor ក្រុមហ៊ុន semiconductor ឈានមុខគេរបស់ប្រទេសចិន។

លោក វ៉ាំង ស៊ីងស៊ីង王兴兴 Wángxìngxìng – ស្ថាបនិក និងជានាយកប្រតិបត្តិនៃ Unitree Robotics ដែលជាអ្នកបង្កើតបច្ចេកវិទ្យាបញ្ញាសិប្បនិម្មិត និងមនុស្សយន្ត។

លោក ឡីជុន 雷军 Léijūn – ស្ថាបនិក និងជានាយកប្រតិបត្តិរបស់ក្រុមហ៊ុន Xiaomi ដែលជាក្រុមហ៊ុនស្មាតហ្វូនឈានមុខគេ និងក្រុមហ៊ុនឧបករណ៍ IoT ឈានមុខគេ។

លើសពីនេះ ប្រព័ន្ធផ្សព្វផ្សាយក្នុងស្រុករបស់ចិន CMG ក៏បានបង្ហាញឱ្យដឹងពីនាយកប្រតិបត្តិជាន់ខ្ពស់ដែលអ្នកណាក៏ស្គាល់បានចូលរួមក្នុងកិច្ចប្រជុំនេះផងដែរ ដូចជា៖

លោកម៉ា ហ័រធឹង马化腾 Mǎhuàténg ឫ Pony Ma – នាយកប្រតិបត្តិនៃក្រុមហ៊ុនហ្គេម និងប្រព័ន្ធផ្សព្វផ្សាយសង្គមយក្ស Tencent ។

លោកចែកម៉ា  马云 Mǎyún Jack Ma – ស្ថាបនិកក្រុមហ៊ុន Alibaba ដែលជាក្រុមហ៊ុនពាណិជ្ជកម្មអេឡិចត្រូនិក និងបច្ចេកវិទ្យាសកល។

ហើយរួមទាំងលោក  លាំង វឹនហ្វឹង 梁文锋 Liángwénfēng ដែលជាស្ថាបនិក DeepSeek ដែលជាការចាប់ផ្តើម AI ដែលកំពុងល្បីបច្ចុប្បន្ននេះ។

ចំណុចសំខាន់នៃសន្និសីទគឺការបង្ហាញខ្លួនរបស់ស្ថាបនិកក្រុមហ៊ុន Alibaba លោក Jack Ma ដែលបានអវត្តមានពីប្រព័ន្ធផ្សព្វផ្សាយអស់រយៈពេលប៉ុន្មានឆ្នាំកន្លងមកនេះ មុនពេលវិលត្រឡប់ទៅកាន់ការប្រារព្ធខួបលើកទី 20 របស់ក្រុមហ៊ុន Ant Group នៅចុងឆ្នាំ 2024 បន្ទាប់ពីបានផ្អាកអស់រយៈពេល 4 ឆ្នាំ ជំនួបរបស់គាត់ជាមួយលោក Xi Jinping គឺជានិមិត្តសញ្ញាដ៏សំខាន់នៃការផ្លាស់ប្តូររបស់រដ្ឋាភិបាលចិនក្នុងការគាំទ្រវិស័យឯកជន ជាពិសេសនៅក្នុងវិស័យបច្ចេកវិទ្យា។

នៅក្នុងសុន្ទរកថារបស់លោក ស៊ី ជីនភីង បានសង្កត់ធ្ងន់លើការលុបបំបាត់ឧបសគ្គចំពោះការប្រើប្រាស់ធនធានដោយយុត្តិធម៌ និងការលើកកម្ពស់ការប្រកួតប្រជែងដោយយុត្តិធម៌ ហើយ​បាន​បញ្ជាក់​ថា​ខ្លួន​នឹង​គាំទ្រ​ដល់​ការ​ចូល​ទៅ​រក​ប្រភព​មូលនិធិ​សម្រាប់​ក្រុមហ៊ុន​ឯកជន នេះ​ជា​ការ​ឆ្លើយ​តប​ទៅ​នឹង​តម្រូវ​ការ​របស់​អាជីវកម្ម​ដែល​មាន​បញ្ហា​ក្នុង​ការ​ចូល​ទៅ​រកប្រភពដើម​ទុន។

ក្នុងប៉ុន្មានឆ្នាំនេះ ក្រុមហ៊ុនឯកជនរបស់ចិន ជាពិសេសក្រុមហ៊ុននៅក្នុងវិស័យបច្ចេកវិទ្យា បានប្រឈមមុខនឹងសម្ពាធពីបទប្បញ្ញត្តិរបស់រដ្ឋាភិបាលបាននាំឱ្យមានយុគសម័យងងឹតនៅក្នុងឧស្សាហកម្មបច្ចេកវិទ្យារបស់ចិន តម្លៃភាគហ៊ុន និងប្រាក់ចំណូលត្រូវបានប៉ះពាល់យ៉ាងខ្លាំង នេះបាននាំឱ្យ CEO ជាច្រើនឃ្លាតឆ្ងាយពីប្រព័ន្ធផ្សព្វផ្សាយ រួមទាំងលោក Jack Ma ផងដែរ។

ការដែលរដ្ឋាភិបាលចិនមកជួបជាមួយក្រុមហ៊ុនបច្ចេកវិទ្យាធំៗរបស់ចិននៅពេលនេះ គឺជាសញ្ញាដ៏សំខាន់នៃការបន្ធូរបន្ថយវិធានការ ហើយ​​ឆ្លុះ​បញ្ចាំង​ឱ្យ​ឃើញ​ថា ចិន​កំពុង​មើល​ឃើញ AI និង​បច្ចេកវិទ្យា​ជា​ក្បាលម៉ាស៊ីន​ដ៏​សំខាន់​សម្រាប់​ការ​អភិវឌ្ឍ​ប្រទេស​នា​ពេល​អនាគត។

អ្នក​ជំនាញ​និយាយ​ថា​សន្និសីទ​នេះ​ជា​សញ្ញា​វិជ្ជមាន​សម្រាប់​វិស័យ​ឯកជន​របស់​ប្រទេស​ចិន ដោយសង្កត់ធ្ងន់ថា សហគ្រាសឯកជនគឺជាកម្លាំងដ៏សំខាន់ក្នុងការអភិវឌ្ឍន៍បច្ចេកវិទ្យាក្នុងស្រុក វិស័យឯកជនរបស់ប្រទេសចិនបច្ចុប្បន្នបានដើរតួនាទីយ៉ាងសំខាន់ក្នុងសេដ្ឋកិច្ច ដែលស្មើនឹង 48.6% នៃពាណិជ្ជកម្មបរទេស 56.5% ការវិនិយោគទ្រព្យសកម្មថេរ និង 59.6% នៃចំណូលពន្ធរួមចំណែកដល់GDP ជាង 60% នៃផលិតផលក្នុងស្រុកសរុប ហើយក៏ជាប្រភពនៃការច្នៃប្រឌិតជាង 70% និងបង្កើតការងារនៅទីក្រុងជាង 80% ។

លោក លី យ៉ុង Li Yong ប្រធានអ្នកស្រាវជ្រាវនៅវិទ្យាស្ថាន D&C Think Tank បានប្រាប់ CGTN ថាការជ្រើសរើសក្រុមហ៊ុនឯកជនឈានមុខគេចូលរួមប្រជុំ គឺឆ្លុះបញ្ចាំងពីការប្តេជ្ញាចិត្តរបស់រដ្ឋាភិបាលចិនក្នុងការគាំទ្របច្ចេកវិទ្យាឯកជន សង្កត់ធ្ងន់ថា ការអភិវឌ្ឍន៍វិស័យឯកជន គឺជាមូលដ្ឋានគ្រឹះនៃ “សង្គមនិយមជាមួយលក្ខណៈចិន”។

បញ្ហាសំខាន់មួយដែលបានលើកឡើងគឺការបដិសេធគំនិតនេះ “វិស័យឯកជនត្រូវតែដកខ្លួនចេញពីសេដ្ឋកិច្ច” (Exit Theory) បញ្ជាក់ថា ជំហររបស់វិស័យឯកជនមានតួនាទីសំខាន់ក្នុងការជំរុញគោលនយោបាយរបស់រដ្ឋាភិបាល ដោយរដ្ឋាភិបាលចិនបន្តគាំទ្រ ក្នុងបរិយាកាសវិនិយោគនឹងនៅដដែល។

យោងតាមសេចក្តីសម្រេចចិត្តរបស់គណៈកម្មាធិការមជ្ឈិមបក្សកុម្មុយនិស្តចិនដែលបានចេញផ្សាយនៅថ្ងៃទី 18 ខែកក្កដា ឆ្នាំ 2024 ប្រទេសចិននឹងបង្កើនការវិនិយោគនៅក្នុងឧស្សាហកម្មនាពេលអនាគតដូចជា AI និងបច្ចេកវិទ្យាព័ត៌មានថ្មី លំហអាកាស ថាមពលថ្មី សម្ភារៈថ្មី ឧបករណ៍ទំនើបៗ និងបច្ចេកវិទ្យា ដើម្បីបង្កើនការប្រកួតប្រជែងជាសកល។

អត្ថបទដោយ ៖ សេនាមេឃ

ប្រភព ៖ THESTATESTIMES