រុស្ស៊ីបង្ហាញសំណើសម្រាប់ការបង្កើតប្រព័ន្ធហិរញ្ញវត្ថុអន្តរជាតិថ្មីមួយទៅកាន់ប្រទេសជាសមាជិក BRICS ទាំងអស់នៅក្នុងកិច្ចប្រជុំកំពូលរបស់ក្រុមក្នុងសប្តាហ៍នេះ នេះបើតាមរបាយការណ៍របស់ Reuters សំអាងតាមឯកសារដែលបានចែកចាយទៅកាន់សារព័ត៌មានដោយក្រុងម៉ូស្គូ មុនពេលសកម្មភាពនេះ។
ប្រព័ន្ធនេះត្រូវបានគេជឿថាត្រូវបានរចនាឡើងដើម្បីផ្តល់ការការពារប្រឆាំងនឹងទណ្ឌកម្មរបស់លោកខាងលិច ហើយអាចនឹងបញ្ចប់ការត្រួតត្រាពិភពលោករបស់ប្រាក់ដុល្លារ
បើតាមការចុះផ្សាយរបស់ Reuters ទំរង់វេទិកាថ្មីនេះនឹងផ្អែកលើបច្ចេកវិទ្យា blockchain និង (Digital Token) និមិត្តសញ្ញាឌីជីថលដែលគាំទ្រដោយរូបិយប័ណ្ណក្នុងស្រុកនៃប្រទេសដែលចូលរួម។
ទម្រង់នេះជាការបើកផ្លូវប្រើប្រាស់រូបិយប័ណ្ណផ្សេងៗកាន់តែងាយស្រួលនិងធានាការផ្លាស់ប្តូរដោយសុវត្ថិភាពដោយមិនចាំបាច់ប្រើប្រាក់ដុល្លារសម្រាប់ប្រតិបត្តិការ ត្រូវបានគេរាយការណ៍ថាវេទិកាថ្មីនេះនឹងពឹងផ្អែកលើបណ្តាញធនាគារពាណិជ្ជក្នុងការតភ្ជាប់គ្នាតាមរយៈធនាគារកណ្តាលនៃប្រទេសសមាជិក BRICS ផងដែរ។
ឯកសារនេះក៏បានបន្ទោសអំពីស្ថាប័នហិរញ្ញវត្ថុអន្តរជាតិដែលមានស្រាប់ផងដែរក្នុងនោះរួមមាន មូលនិធិរូបិយវត្ថុអន្តរជាតិ ថាបានបម្រើផលប្រយោជន៍របស់សហរដ្ឋអាមេរិក និងសម្ព័ន្ធមិត្តរបស់ខ្លួន។
រុស្ស៊ីមិនបានធ្វើអត្ថាធិប្បាយលើរបាយការណ៍របស់សារព័ត៌មាន Reuters ទេនិងមិនបានផ្សព្វផ្សាយឯកសារណាមួយដូចដែលប្រព័ន្ធផ្សព្វផ្សាយនេះអះអាង កាលពីដើមសប្តាហ៍នេះ រដ្ឋមន្ត្រីការបរទេសរុស្ស៊ី លោក Anton Siluanov បង្ហាញសំណើមួយសម្រាប់កំណែទម្រង់ប្រព័ន្ធហិរញ្ញវត្ថុអន្តរជាតិ ដល់រដ្ឋមន្ត្រីការបរទេស និងទេសាភិបាលធនាគារកណ្តាលនៃប្រទេស BRICS ផ្សេងទៀត។
ក្នុងឱកាសនោះ Siluanov បានរិះគន់លោកខាងលិចថាខ្លួនកំពុងព្យាយាមប្រើប្រព័ន្ធរូបិយវត្ថុអន្តរជាតិ និងប្រាក់ដុល្លារ គឺជាផ្លូវមួយសម្រាប់សម្ពាធនយោបាយ ហើយគាត់បាននិយាយថា BRICS បាននិងកំពុងពិភាក្សាអំពីជម្រើសសម្រាប់ប្រព័ន្ធទូទាត់អន្តរជាតិដែលគ្រប់គ្រងដោយលោកខាងលិចមួយរយៈហើយ ក៏ដូចជាប្រព័ន្ធទូទាត់មូលបត្រ និងភ្នាក់ងារវាយតម្លៃឥណទាន លោករដ្ឋមន្ត្រីបាននិយាយថា ទ្រព្យសម្បត្តិហិរញ្ញវត្ថុឌីជីថលថ្មីក៏គួរតែត្រូវបានប្រើប្រាស់នៅក្នុងប្រព័ន្ធទូទាត់អន្តរជាតិផងដែរ “វាលឿនជាង ថោកជាង និងអាចទុកចិត្តបាន ប្រតិបត្តិការនេះត្រូវបានអនុវត្តដោយមិនមានការចូលរួមពីធនាគារ ឬបែបបទពីប្រទេសទីបីនោះទេ» តែសេចក្តីលំអិតមិនទាន់ច្បាស់នៅឡើយទេ។
កន្លងមកប្រទេសរុស្ស៊ីបានខ្នះខ្នែងក្នុងការកាត់បន្ថយការប្រើប្រាស់ប្រាក់ដុល្លារក្នុងប្រតិបត្តិការអន្តរជាតិដោយ 95% នៃការទូទាត់គ្នាទៅវិញទៅមក រវាងរុស្ស៊ី និងចិន ដៃគូពាណិជ្ជកម្មធំបំផុត ត្រូវបានអនុវត្តតាមរយៈរូបិយប័ណ្ណក្នុងស្រុក (រូប្លិង និងយន់) នេះបើយោងតាមនាយករដ្ឋមន្ត្រីរុស្ស៊ី Mikhail Mishustin នៅក្នុងខែសីហា។
នេះបើតាមការបញ្ជាក់របស់លោក Siluanov បណ្តាប្រទេស BRICS នឹងបន្តទៅមុខទៀត ដើម្បីកាត់បន្ថយការប្រើប្រាស់ប្រាក់ដុល្លារអាមេរិកនៅក្នុងប្រតិបត្តិការរួមគ្នា ហើយងាកមកប្រើរូបិយប័ណ្ណក្នុងស្រុកជំនួសវិញ។
កិច្ចប្រជុំកំពូល BRICS គ្រោងនឹងធ្វើឡើងនៅទីក្រុង Kazan ភាគនិរតីនៃប្រទេសរុស្ស៊ី ចន្លោះពីថ្ងៃទី 22 ដល់ថ្ងៃទី 23 ខែតុលា ទីក្រុងមូស្គូបច្ចុប្បន្នកាន់តំណែងជាប្រធាន BRICS ដែលរួមមានប្រេស៊ីល ឥណ្ឌា ចិន និងអាហ្វ្រិកខាងត្បូង អេហ្ស៊ីប អ៊ីរ៉ង់ អេមីរ៉ាតអារ៉ាប់រួម និងអេត្យូពី មានប្រទេសជាង៣០ទៀតក្នុងនោះមានប្រទេសតួកគីជាសមាជិកអូតង់ដែលបានដាក់ពាក្យចូលរួមជាសមាជិកនៃក្រុមសេដ្ឋកិច្ចនេះនេះបើតាមការបង្ហើបរបស់មន្ត្រីរុស្ស៊ី
(ប្រភព៖ RT News/Reuters)
