មេតា Meta Platforms ម្ចាស់ Facebook និង Instagram ត្រូវប្រឈមមុខនឹងបណ្តឹងថ្មីមួយនៅក្នុងប្រទេសជប៉ុនកាលពីថ្ងៃអង្គារ (29 តុលា) ដោយដើមបណ្តឹងចំនួន 30 នាក់បានទាមទារសំណងចំនួន 435 លានយ៉េន ចំពោះការខាតបង់សម្រាប់ការផ្សព្វផ្សាយធ្វេសប្រហែសអាងអ្នកល្បីបោកបញ្ឆោតឱ្យវិនិយោគ។
នៅក្នុងពាក្យបណ្តឹងរបស់ដើមបណ្តឹងដែលបានប្តឹងទាមទារសំណងការខាតបង់ទៅតុលាការស្រុកនៅ Osaka, Kobe, Yokahama, Chiba និង Saitama បាននិយាយថាក្រុមហ៊ុនបច្ចេកវិទ្យាយក្សរបស់សហរដ្ឋអាមេរិកនិងសាខាជប៉ុនរបស់ខ្លួនមិនបានបំពេញគ្រប់គ្រាន់ដើម្បីការពារការក្លែងបន្លំការផ្សាយពាណិជ្ជកម្មអូសទាញការវិនិយោគបែបនេះ ប្រើការបោកប្រាស់ដោយក្លែងបន្លំអាងអ្នកល្បីជាអ្នកគាំទ្រ ហើយជនរងគ្រោះចាញ់ល្បិចកលបន្ទាប់ពីមើលខ្លឹមសារដែលបំភាន់ ពួកគេត្រូវបានបោកបញ្ឆោតឱ្យផ្ទេរប្រាក់ទៅក្នុងគណនីវិនិយោគដែលបានកំណត់។
ក្នុងចំណោមអ្នកល្បីដែលមានពាក់ព័ន្ធក្នុងការផ្សព្វផ្សាយបោកប្រាស់វិនិយោគគឺអ្នកជំនួញល្បី Yusaku Maezawa ស្ថាបនិកហាងលក់សំលៀកបំពាក់តាមអ៊ីនធឺណិត Zozo Inc. ដែលធ្លាប់បានធ្វើដំណើរទៅកាន់ស្ថានីយអវកាសអន្តរជាតិ ជាមួយនឹងយានអវកាសរុស្ស៊ីនៅឆ្នាំ 2021
ដើមបណ្តឹងអះអាងថា Meta មានកាតព្វកិច្ចត្រួតពិនិត្យខ្លឹមសារនៃការផ្សាយពាណិជ្ជកម្ម ហើយការបង្ហោះតាមបណ្តាញសង្គមក៏មិនគួរត្រូវបានអនុញ្ញាត ប្រសិនបើឃើញថាវាប្រថុយនឹងបង្កគ្រោះថ្នាក់ដល់អ្នកប្រើប្រាស់។
“Maesawa និង Takafumi Hiri អ្នកជំនួញម្នាក់ទៀត បានស្នើឱ្យ Facebook លុបការផ្សាយពាណិជ្ជកម្មមិនពិតបែបនេះ ប៉ុន្តែ Meta មិនបានអើពើនឹងការទាមទាររបស់ពួកគេទេ និងបង្កការខូចខាតបន្ថែម” នេះបើយោងតាមការអះអាងរបស់ Kusuo Tsunaoka មេធាវីដើមបណ្តឹង។
Tsunaoka បានបង្ហាញក្នុងសន្និសីទសារព័ត៌មានក្រុមច្បាប់កំពុងពិចារណាដាក់ការចោទប្រកាន់បន្ថែមទៀត ហើយបានបញ្ជាក់ថា «បើមនុស្សច្រើនចេញមុខមកនិយាយ យើងនឹងមានច្បាប់បន្ថែមទៀតដើម្បីដោះស្រាយជាមួយនឹងការផ្សាយពាណិជ្ជកម្មមិនពិត»។
មេតាត្រូវបានប្ដឹងម្តងកាលពីដើមឆ្នាំនេះនៅក្នុងពាក្យបណ្តឹងដែលដាក់ដោយក្រុមមនុស្ស4នាក់នៅទីក្រុង Kobe ទោះជាយ៉ាងណាក៏ដោយ ក្រុមហ៊ុនកំពុងស្វែងរកការច្រានចោលការទាមទារសំណងរបស់មនុស្សទាំងនេះ។
(ប្រភព៖ Japan Today/Xinhua)
